வீட்டிற்கு காலையிலேயே நடேசன் வந்துவிட்டான்.பெரியம்மாவும் கையகல தட்டில் மூனு இட்லியும்,பொதினா சட்னியும் வைத்து அவனிடம் கொடுத்தும் விட்டாள்.அப்பா யூனிஃபார்ம் போட்டுக்கொண்டிருக்க,அவர் காதருகே அம்மா எதையே சொல்ல ரெண்டு,மூனு நூறு ரூபாய் கொடுத்து விட்டு நடேசன் பக்கம் வந்தார்.
" இன்ஸ்பெக்டர்கிட்ட விஷயத்தை நேத்திக்கே சொல்லிட்டேன்..மதியமா வந்துரு வரும்போது காசும் கொண்டுவந்துரு..என்னடா அப்டி பாக்குறே எனக்கெல்லாம் அதுல அஞ்சு பைசா வராது புரியுதா"
"சரி மாமா.." சொல்லிவிட்டு அப்பா போய்விட்டார்.அவர் சப் இன்ஸ்பெக்டர்.
எனக்கு பள்ளி நான்கு நாட்கள் விடுமுறை.ஊரில் பெரிய மாரியம்மன் கோவில் திருவிழா.நாளை மறுநாள் எலிமென்ட்ரி ஸ்கூல் மைதானத்தில் நாடகம் போட போலீஸ் அனுமதி எளிதாக கிடைப்பதற்காக தான் நடேசன் அப்பாவை பார்க்க வந்திருந்தான்.
நடேசன் ஒரு வகையில் சொந்தம்.ஊரிலிருந்து இருபது நிமிஷம் நடந்தால் அவன் வீடு வந்துவிடும் சுற்றிலும் வயலும் தென்னமரம் கிணறுமாய்.நடேசனுக்கு இருபத்தி மூனு வயதிருக்கும் சராசரி உயரம்,நல்ல சிவப்பு,பழைய நடிகர் ராஜூவ்வை ஞாபகபடுத்தும் முகம்,கழுத்தை நெறிக்கும் சங்கிலி,எம் ஏய்ட்டி வண்டி சகிதம் மைனர் போல வளைய வருவான்.ஜாதி வித்தியாசம் பார்ப்பான்.இவன் சிறுவயதிலே அப்பா அம்மாவை இழந்தவன்.வீட்டில் இவன் அண்ணன் அன்னி மூவர் மட்டும் தான்.அண்ணனுக்கு குழந்தையில்லை பத்துவயசிலிருந்து அண்ணி தான் வளர்க்கிறாள்.அவன் மீது பேய் பாசம்.கடைத்தெருவில் நாலைந்து வாடகை வீடு உண்டு.அதில் ஒரு கடை மாடியில் தான் சதா எப்போதும் இருப்பான் மதியம் ஒயர் பை,ஐந்தாறு சுட்ட அப்பளத்தை பாலித்தினில் போட்டு பெரிய கேரியரோடு வந்துவிடுவாள்.எல்லாரிடமும் பெரிய வாய்சவடால் விடுபவன் அண்ணியைக் கண்டால் மட்டும் தண்ணீர் தெளித்த நெருப்பாய் அமுங்கி விடுவான்.
நடேசன் சுத்தி முத்தி பார்த்துவிட்டு இட்லி பிட்டு வாயில் போட்டுக் கொண்டே," இந்த தடவ சேலம் கிச்சிப்பாளையத்துலருந்து தரமா மூனு பேர கொண்டுவரேன்..நாளைக்கு வந்துருவாளுங்க ரிகர்சல் இருக்குல..நீ தான் அந்த பண்ணையார் வேஷத்துக்கு மாட்டேன்னுட்ட" என்றான்.
அண்ணன்,"அய்யோ! நீ வேற போஸ்டர்ல 'வானவில் நண்பர்கள் குழு'ல எம் பேரு போட்டதுக்கே முறைச்சிட்டுருக்காரு..சரி வராதுரா."என்றான்.பெரியப்பா மகன்.
மறுநாள் மதியம் ரிகர்சல் பார்க்க நடேசன் தங்கிருக்கும் மாடிக்கு சென்றேன்.சிறிய ரூம்,மடக்கு கட்டில்,மர மேஜை,பானை.முன்னால் ஆஸ்பெஸ்டாஸ் இறக்கி,தென்ன தடுக்கில் சுற்றியிருந்தது.ஐந்தாறு பேர் நின்றும் உட்கார்ந்தும் சுவற்றில் சாய்ந்தும் இருந்தனர்.மர ஸ்டூலில் டேபிள் ஃபேன்.அண்ணன் என்னைப் பார்த்ததும் புருவம் சுருக்கி கண்ணால் மடக்கு தகர நாற்காலியை காட்டினாள்.
"...அதற்காக ஏன் சாந்தி இப்படியெல்லாம் பேசுகிறாய்? உன்னிடம் காதல் ரசமும்,காமம் சரசமும் செய்து விட்டு கனவிலும் வேறொரு பெண்ணை நினைக்கமாட்டேன்..சாந்திஈஈ..சாந்திஈஈ." வசனம் பேசிய நடேசன் ஒரு சிவந்த குள்ளமான கொத்தவரங்காய் பெண்ணை இசகுபிசகாய் கட்டிப்பிடித்து அழுது உள்ளங்கையால் அவள் முதுகை தேய்த்துக் கொண்டிருந்தான்.ஓரத்தில் நீண்ட மரப்பலகையில் குண்டு குண்டாய் இரண்டு பெண்கள் அருகில் ஒரு கிழவி பிளாஸ்டிக் விசிறியை ஆட்டிக்கொண்டிருந்தாள்.என் வயது பசங்க நாலைந்து பேர் அவர்களை சுற்றி மாரையே வெறித்திருந்தனர்.
நடேசன்," போதும் என்ன துர்கா..இப்பவே டயர்டாய்ட்ட ச்சும்மா பிச்சு ஒதர்ற வசனம் மறந்தாலும் நீயா ஒன்னுப் போட்டு பேசியிற..அற்புதம் அற்புதம்" கொத்தவராங்காய் முழங்கையை நசுக்கினான்.திரும்பி யாரையோ கூப்பிட்டு நடிகைகளை குமார் மிலிட்டரி ஹோட்டலுக்கு அழைத்துப்போக சொல்லிவிட்டு,சேரில் அமர்ந்து ஃபேனின் தலையை தன்பக்கம் திருப்பினான்.அங்கே அண்ணன்,நடேசனின் கூட்டாளிகள் ரெண்டு பேர் முதுகில் அமர்ந்து தரையில் காலை விரித்து தலைக்கு மேல் கை கட்டி இருந்தனர்.அலுங்காமல் அறைக்குள் ஒதுங்கிடனும் இல்ல அண்ணன் வெரட்டி விடுவான்.நான் கட்டிலில் அமர்ந்து பேப்பரை நோன்டிக்கொண்டிருந்தேன்.
"ப்பா..அவள பாத்தயா.. அதான் துர்க்காவோட அக்காவ அங்க உக்காந்திருந்தாளே செவப்பு ஜாக்கெட்டு புகையில போட்டுருந்தாளே..ம்ம் தரமா இருக்கா என்ன..புருஷன் ஓடிப்போய்ட்டானாம்..இவ அம்மாவும் நாடகத்துல தான் இருந்தாளாம் தங்கச்சி மட்டும் நடிச்சுட்டு இருந்தா பணம் போராதுன்னு இவளும் வந்துட்டாளம்..முழு காசும் கொடுத்து புக் பண்ணும் போது ' ஒத்துழைப்பு பக்காவா இருந்தா இன்னும் கிடைக்கும்'னு ஜாட மாடயா சொன்னேன்..சிரிச்சுக்கிட்டே வாங்கிகிட்டா..மார பாத்தயா வயிறு வரைக்கும்." என்று இரண்டு கையையும் கிண்ணம் போல் விரித்து அவன் வயிற்றில் வைத்து சிரித்தான்.
அவன் அண்ணி கேரியருடன் வர நான் இறங்கிவிட்டேன்.கடைத்தெருவில் கூட்டம் அப்பியது.எங்கும் போஸ்டர்.விரலிடுக்கில் 'கேமல்' இங்க கட்டைப் பேனா பிடித்து தாடையில் கை வைத்து எதையோ யோசிப்பது போல் தேர் முட்டி தகரத்தை சுற்றி ஒட்டிருந்தான்.நடிப்புச் சிங்கம் நடேசன் எழுதி நடிக்கும் ' சாந்திக்கு எங்கே சாந்தி ' எனும் சமூக சிந்தனை நாடகம்' நாள்: சனி,இடம்...விரல் நீட்டி ஆக்ரோஷம் படும் நடேசன் ஃபோட்டாவை பார்க்கையில் சிரிப்பாயிருந்தது.
நடேசன் நாடகத்தை படு ஜோராய் சிறப்பாக முடித்து எல்லோரும் போய் விட,நாலு நரம்பு பை நிறையாக எதையோ அமுத்தி பிடிக்க முடியாமல் மறுநாள் சாய்ந்தரம் துர்காவை மட்டும் தனியாக பஸ் ஏற்றிவிட்டான்.
சில மாதம் கழிந்து பொங்கல் விடுமுறை முடிந்த ஞாயிறு மதியம் அன்று,எலிமென்ட்ரி ஸ்கூல் ஸ்போர்ட்ஸ் ரூம் மர பெஞ்சில் நடேசன் கூட என் அண்ணன்,பீட்டி மாஸ்டர் செல்லமுத்து இன்னும் ரெண்டு மூனு பேர் உட்காந்திருந்தார்கள்.நான் காற்றுப்போன வாலிபாலின் மூக்கில் வால் டியூப் சொருகி 'வுஸ்ஸூக்..வுஸ்ஸூக்' காற்று ஏற்றிக்கொண்டிருந்தேன்.
"சிங்கார வேலனுக்கு செம க்கூட்டம்..அதுவும் க்குஸ்பு ம்ம்ம்..யப்பா பந்து விளையாடுவா பாரு ஜம்ப் பண்ணீ..க்கும் டைரக்டர் நின்னு எடுத்துப்பான் இன்னொரு தடவ பாக்கனும் மிட்லன்ட்டுக்கு மாறதுக்குள்ள."நடேசன்.
பிறகு க்கிரவுன்ட் ஓடிப்போய் பந்து விளையாடி இருபது நிமிஷம் இருந்திருக்கும்
ஸ்போர்ட்ஸ் ரூம் முன்பு நாலைந்து பேர் செல்லமுத்துவிடம் வாய்ச் சண்டைப் போட அவர்களை நோக்கி ஓடிப்போய் சன்னல் கதவைப் பிடித்துக் கொண்டு நின்றேன்.அந்த நாலைந்து பேரில் பெரிதும் கத்துபவன் சுப்பு.
சுப்பு," செல்லமுத்தே! ஒனக்கோஷரம் தான் இவ்வளவு பதுவுசா பேசறேன்..இல்ல அந்த ஒக்காலி பய்யன இங்கயே இவுத்தாலேயே செஞ்சுட்டுப்போய்ருவேன் ஆமா தெரிஞ்சுக்கோ."கத்தினான்.
"சுப்பே..வார்த்த வார்த்தைய பாத்துப் பேசனும்..சொல்லிட்டேன்." பதிலுக்கு நடேசனும் எகிற,
செல்லமுத்து மாஸ்டரும் என் அண்ணனும் எவ்வளவு சமாதனம் சொல்லியும் சுப்பு கேட்கவில்லை.குனிந்து மண்ணுக்குள் கல்லைத் தேடிக் கொண்டிருந்தான்.தள்ளாடினான் குடித்திருக்கிருறான்.
சுப்பு," ச்செல்லமுத்து,வீட்டுக்கு வந்து மூச்சு மூச்சுனு அழுவறா இவன் தோட்டத்துக்கு சாணியெடுக்க போனவகிட்ட ' நாளைக்கு மில்லுக்கு வா..கறவ மாடே தரேன்'ங்கிறானாம்..டைப் கிளாசு முடிஞ்சு போறவகிட்ட 'வண்டியில ஏறு வீட்ல எறக்கிவிட்றேன்'ங்கிறானாம்..ஆட்டக்கடிச்சு மாட்டக்கடிச்சு இப்ப வாய எங்க வெக்கபாக்குறான் பாத்தியா..நான் அப்டியே ஒன்ன மேய உட்ற மாட்டேன்டி பாத்துக" கண் ரெண்டு சிவந்து விட்டது.
புரிந்து விட்டது.நடேசன்,சுப்புவின் தங்கச்சி பாப்பாயம்மாளிடம் வால் ஆட்டிருக்கிறான்.சுப்பு பொல்லாதவன் படிப்பறிவும் குறைவு,வார்ட் மெம்பர் கூட,சும்மாவே ஆடுவான் இப்போ வயிற்றில் சாராயம் வேறு.பேயாட்டம்.
சில நாட்கள் நடேசன் அடங்கிருந்தான்.பழய துள்ளல் இல்லை,சினிமா இல்லை,எம் ஏய்ட்டி ரவுண்ட்டும் குறைந்திருந்தது.நடேசனும் என் அண்ணனும் கருவேல குளத்தருகே கல்லில் உட்கார்ந்திருந்தனர்.நான் வாங்கி வந்திருந்த வில்ஸ் பாக்கெட்டும் மிச்சரையும் நடேசனிடம் கொடுத்தேன்.மீதி சில்லரை கொடுக்கவில்லை.அழுதுருக்கிறான்.அவனை சுற்றிய காற்றில் பிராந்தி.கண்கள் சிவந்து,மூக்குஉறிந்து,ஒடைந்த கொட்டாச்சியை மண்ணில் கிளறிக்கொண்டிருந்தான்.
"ப்பச்..எவ்ளவோ சொல்லியும் ஒத்துக்க மாட்டுக்கறா..மாறிட்டேன் சத்தியமா மாறிட்டேன்னா நம்ப மாட்டுக்கறா..எங்கண்ணே சேலத்துல மாப்புள பாத்துருக்கு நீ கிட்ட வந்த மறுப்படி வீட்டுல சொல்லிருவேன்ங்கிறா..அண்ணியும் வேண்டான்டா வேற பொண்ண பாக்கலாம்னுது..முடியலடா கோயில்ல வெச்சு பாத்தேன்..அப்பேயே கவுந்துட்டேன் இவள தான் கட்டனும் இனி தொடரதுனாலும் இவ தான் நெனச்சேன்..எல்லாம் போச்சுடா." என்றான் நடேசன்.
"இப்பென்னா ஆச்சு பொறுமை இருடா..என் சித்தாப்பாட்ட சொல்லி சுப்புகிட்ட பேச சொல்றேன்..இப்டி அழுது குடிச்சு புலம்பனா சரியாய்டும்மா..பொறு..திரும்ப சொல்றேன் பொறுமையா இரு."
" இல்லடா..இன்னைக்கு நைட் இப்டியா தானே போவான்..நிறுத்தி கேட்டுறேன்..முடிவா என்ன சொல்லுறனு..பொம்பளைங்க கிட்ட போறான் போறான்னா..இவன் மட்டும் யோக்கியமா..இதோ இதே குளத்துக்கிட்ட அங்க பெரிய கல்லுருக்குள்ள அங்க வெச்சு போஸ்ட்மேன்காரன் பொண்டாட்டிய இடுப்புல தூக்கிட்டு நின்னத நானே பாத்துருக்னேன்..இவன் என்னச் சொல்றான்."
மீண்டும் குடித்தான்.அழுதான்.அதே புலம்பல்.புரண்டான்.சிகரெட் குடித்தான் அவன் நாடக வசனத்தை கவிதையாக கத்தினான்.மீண்டும் குடித்தான்.மட்டையாகிப் போனான்.அண்ணனும் நானும் அவனை அள்ளி வீட்டில் போட்டுவிட்டு மதியம் வீடு வந்தோம்.நடேசன் நல்ல வசதி,தோட்டம்,நாலைந்து கடை வாடகை,அரிசி மில்,மாடு,ஆடு,எருமை.பெண்களை எளிதாக கவரும் கவர்ச்சியான முகம்,பேச்சு,கதையெழுதும் திறமை.எதுவும் பாப்பாயம்மாளை கவிழ்க்கவில்லை.அவன் திருந்திருக்கிறான்,இனி எந்த தப்பு தண்டாளும் செய்யமாட்டேன் என்கிறான்.கயாணம் செய்து விவாயம்,மனைவி,குழந்தைகள் எத்தனை கனவு கண்டிருப்பான்.கண்ட பெண்களையெல்லாம் வளைத்து கட்டிலில் சேர்த்தவன் உண்மையான காதல் எதவென்று உணர்ந்துவிட்டான்.ஆனால் பாவம்..
டிடி டிவியில் விருது வாங்கிய வங்காளி படம்.வேஷ்டியில் கோமனம் கட்டியவன் பத்து நிமிஷம் எங்கேயோ நடந்தான்.நடந்துக்கிட்டேருந்தான்.
தூங்கிப்போனேன்.யாரோ பேசும் சப்தம் கேட்டு எழுந்தேன்.வெளியே நடேசன்.மாலை 6 மணி. வேறுவுடைப் போட்டிருந்தான்.நேர்த்தியா சீவாத தலை.கை கால் தடுமாற்றம் இல்லை.வார்த்தை மட்டும் குழரியது.அண்ணன் ஓடி அவனிடம் ஏதோ பேசினான்.விரல்களால் மிரட்டினான்.கவனிக்கிறார்களா என்று வீட்டுக்குள்ளேயும் பார்த்துக்கொண்டான்.
"..ம்மா நடேசன் வந்துருக்கான் படத்துக்கு போலாமாங்கிறான்..போய்ட்டு வந்தரேன் என்ன.." என்றான் என் அண்ணன்.
பெரியம்மா " இவனையும் கூட்டிட்டு போறது தானே..இவன் மட்டும் தனியாவா போவான்.." என்னைக் காட்டிச் சொன்னாள்.
" எதுக்கு.. நாளைக்கு அவனுக்கு ஸ்கூல் இல்ல.."
"ஏன் உனக்கும் தான் காலேஜ் இருக்கு நானும் வரேன் கூட்டிப்போ."
"சொல்லறத கேளு இங்கியே இருடா..அடுத்த வாரம் கூட்டிப் போறேன் என்ன." என்னிடம் கண்ணால் நடேசனை காட்டிவிட்டு முறைத்தான்.நடேசன் தலையைத் திருப்பி எங்கேயோ பார்த்துக்கொண்டிருந்தான்.
சீக்கிரம் அப்பா வரதுக்குள்ள வந்துரு ..உன் சித்தப்பாவும் வந்தவுடன் உன்ன தான் முதல்ல கேப்பாரு பாத்துக்கோ..இன்டர்வெல்ல சிகரெட் புடிக்கிரியாம் கண்ணாடிக்காரர் பேரன் வந்து சொல்றான்..ஏன்டா உன் புத்தி இப்படி போறது..சொல்றா புடிக்கிரியா.."
" அய்யே நீ வேற அதெல்லாம் ஒன்னுல்லம்மா.."
இருவரும் எம் எய்ட்டியில் போய்விட்டனர்.எனக்கு சினிமா பார்க்க வேண்டிய எண்ணமில்லை.அடுத்தது என்ன,நடேசன் என்ன செய்ய போவதாய் உத்தேசம்,பாவம் நடேசன் கலங்கிவிட்டான்,சுப்புவிடம் பேசுவானோ,பாப்பாயம்மாளிடம் கெஞ்சுவானோ 'காதல் ரசம்,காம சரசம் செய்து எப்படி கண்ணே', ' க்காலி செய்சுப்புடுவேன் இங்கேயே தெரிஞ்சுக்கோ' சுப்பு வேற நாக்கை துருத்தினான்.
இரவு சாப்பிட்டுவிட்டு படுத்து பத்து நிமிஷம் இருக்கையில் அண்ணன் வந்தான்.முகம் குழப்பத்திலிருந்தது,சின்ன பதட்டம்,பொறுமையாய் சாப்பிட்டான்.கை கழுகையில் கேட்டான்.
" நடேசன் கீது வந்தானம்மா.."
"ஏன்டா நீங்க ரெண்டு பேரும் தான்டா போயிருந்தீங்க..ஏங்கிட்ட வந்தானானு கேக்குற..சிகரெட் குடிச்சியா..கைய காட்டு."
"ஆமா வந்து வாய மோந்து பாரு..பாதி படம் தான் பார்த்தான்..இன்டர்வெல்லுக்கு முன்னாடியே அண்ணி வேல ஒன்னு சொல்லுச்சு மறந்துட்டேன்னா..சரி நானும் வரேன்னே..நீ படம் பாத்துட்டு வா எவ்ளோ சொல்லிக்கேக்குல போய்ட்டான்..சரி இன்நேரம் பஸ்ஸூம் இல்லன்னு முழுசா பாத்துட்டு வந்தேன்..சேலத்துக்கீது போய்ருப்பான்."
தூங்கிவிட்டேன்.லேட்டா நானே எந்துருச்சேன்.வீட்டுல யாரும் இல்லையா.அப்பா மட்டும் யாரிடமோ ஃபோனில் "எஸ் ஸார் எஸ் ஸார் கருவேல குளம் ஸார் ...ம்ம் வாக்கபுள் டிஸ்ட்டசன் தான் ஸார்.."
கருவேல குளத்துல என்ன? முகம் கழுகி சைக்கிள் எடுத்து வேகமாக மிதித்தேன்.பத்து நிமிஷம் வந்துவிட்டேன்.கொஞ்சம் ஜன நடமாட்டம் இருந்தது.ரெண்டு மூனு காக்கி தலைகள்.சைக்கிளை ரோட்டருகே நிறுத்திவிட்டு ட்ராயரை மேலே ஏற்றிவிட்டு விடு விடு வென்று தாவினேன்.வரப்புகள்,சேறுகள் கடந்து கண்ணில் பட்டது.நடேசன் அண்ணி தலைவிரித்துப் போட்டுவிட்டு கத்திக் கொண்டிருந்தாள்.பக்கத்தில் பெரியம்மா மூக்கை உறிஞ்சுக்கொண்டு அவளை பிடித்துக் கொண்டிருந்தாள்.தூரத்தில் எம் எய்ட்டி சேற்றில் மாட்டி சாய்ந்துக்கிடந்தது.அதனருகில் ரெண்டு காலி குவார்ட்டர் பாட்டில்கள்,நசுக்கிய சிகரெட் பெட்டிகள்,தீப்பெட்டி,நடேசன் செருப்பு.குளம் போகும் வழியில் அறுத்தெறியப்பட்ட அரைஞான் கயிறு,வண்டிச்சாவி.
குளம் சுற்றியுள்ள வரப்பின் அருகில் கொஞ்சம் ஆட்கள்.அவர்களை விலக்கி எட்டிப் பார்த்தேன்.முதுகு முழுவதும் சிவப்பாய் திட்டு திட்டாக,ரப்பர் பந்துப்போல் நிர்வாணமாய் தலையில்லாத முண்டமாக விறைத்துப் போய் நடேசன் குளத்தில் மிதந்துக் கொண்டிருந்தான்.
ஐந்தாறு மாதம் முன்பு தினத்தந்தியை எதாற்த்தமாக திருப்பிக் கொண்டிருக்கையில் கையகலத்திற்கு ஒரு விளம்பரம் ' இருபதாம் ஆண்டு நினைவஞ்சலி' கீழ் வெள்ளந்தியாக நடேசன் சிரித்துக் கொண்டிருக்க உன் பிரிவால் இந்த ஜன்மம் முழுவதும் வாடும் அண்ணன் அண்ணி.இதைக் கண்டதும் இரண்டொரு நாட்கள் என்னை எதோ செய்துவிட்டது.
No comments:
Post a Comment